‘Alternativa e komandantëve’, Musliu-Osmanit: Po e fyen historinë e Kosovës

Kandidatja e PDK-së për deputete, Ganime Musliu, reagoi ndaj deklaratave të ish-presidentes Vjosa Osmani, e cila një natë më parë është shprehur në mënyrë kritike për ish-komandantët e UÇK-së., transmeton Gazeta Metro.

Musliu vlerësoi se qasja e Osmanit tregon shkëputje nga realiteti politik dhe shoqëror në vend. Sipas saj, komentet e bëra në adresë të ish-pjesëtarëve të UÇK-së prekin një pjesë të rëndësishme të së kaluarës së Kosovës dhe nuk duhet të trajtohen me nënvlerësim.

“Kur dikush e sheh veten si të vetmen alternativë, ka filluar ta humbasë kontaktin me realitetin. T’i quash “alternativë të komandantëve” me ton përçmues është fyerje për një pjesë të historisë së Kosovës. Respekti për UÇK-në nuk është alternativë politike, por obligim kombëtar. Askush nuk është mbi qytetarët, e aq më pak mbi historinë e Kosovës. Ata që sot flasin me përbuzje për komandantët, harrojnë se liria dhe shteti që përfaqësojnë janë ndërtuar mbi sakrificën e tyre”, shkroi ajo./gazetametro.net